Psa 121 | CebAPD | STEP | Nagatan-aw ako sa mga bukid; asa man maggikan ang akong gipaabot nga tabang?

Psalms 121

Ang Ginoo ang Akong Tigpanalipod

1 Nagatan-aw ako sa mga bukid;
asa man maggikan ang akong gipaabot nga tabang?
2 Ang maong tabang maggikan sa Ginoo, nga nagbuhat sa langit ug sa yuta.

3 Dili niya itugot nga mapandol ka.
Siya nga nagatipig kanimo, dili matulog.
4 Pamati! Ang nagatipig sa Israel wala magduka o matulog.
5 Ang Ginoo mao ang imong tigpanalipod;
anaa siya sa imong tapad aron sa pagpanalipod kanimo.
6 Ang kainit sa adlaw dili makaunsa kanimo, ni ang siga sa bulan sa panahon sa kagabhion. ^{▼▼Ang mga tawo sa unang panahon nahibalo nga ang labihan nga kainit sa adlaw makadaot, ug nagtuo usab sila nga ang pag-usab-usab sa bulan makahatag ug sakit.}
7 Tipigan ka sa Ginoo gikan sa tanang katalagman;
ampingan niya ang imong kinabuhi.
8 Ang Ginoo motipig kanimo karon ug hangtod sa kahangtoran, bisan asa ka moadto. ^{▼▼bisan… moadto: o, sa imong paglakaw ug pagbalik.}